Sú nýbreytni var tekin upp í haust að nemendur Laugalandsskóla fá nú í allan vetur eina 40 mínútna kennslustund í sundi á viku. Áður hafði sundið verið kennt í lotum á móti íþróttatímum, sund kennt haust og vor og íþróttir yfir háveturinn. Sund- og íþróttatímar voru þá ýmist 80 mín. eða 40 mín. kennslustundir.
Þetta nýja fyrirkomulag fer mjög vel af stað, tíminn nýtist vel og virkni nemenda góð. Í sundtímunum er farið í tækni í öllum greinum sundsins, stig af stigi, allt eftir aldri og þroska nemenda. Þol- og hraðaæfingar eru líka teknar fyrir og markvissir leikir eru oft á dagskrá enda eru þeir kjörnir til að efla alla vatnsaðlögun, samvinnu, þor og áræði nemenda. Gleði og vinnusemi hafa, það sem af er hausti, einkennt sundtímana.
