Þá er fyrstu skólaviku nýs árs að ljúka. Flest eru sammála um að fyrstu skrefin eftir jólafríið eru þung en það er alltaf gott að komast aftur í rútínu. Nemendur og starfsfólk eru komin aftur á fullt í námi og vinnu og skólastarfið að færast í eðlilegt horf. Sumir hafa mögulega sett sér metnaðarfull áramótaheit fyrir árið og verður gaman að sjá hvernig fram vindur.
Það helsta sem liggur fyrir í janúar, fyrir utan að venjast því að þurfa að stilla vekjaraklukku aftur, er handbolti og þorrablót.
Ísland tekur þátt í EM í karla handbolta í ár og af því tilefni verður nemendaráð skólans með handboltakvöld fyrir unglingastig. Verður það 20. janúar þegar Ísland keppir á móti Ungverjalandi. Nánari upplýsingar koma síðar.
Eins og hefð er fyrir þá er haldið þorrablót í skólanum á bóndadegi, 23. janúar. Þá býður mötuneytið upp á klassískt þorrablótshlaðborð. Í aðdraganda þess fá nemendur fyrri parta af vísum sem þeir eiga að botna. Á þorrablótinu verður síðan kynnt hverjir sömdu bestu botnana. Veitt eru verðlaun í eftirfarandi flokkum:
Nú er upplagt að rifja upp ljóðstafi, rím og hrynjanda með börnunum en undanfarin ár hefur samkeppnin verið ansi hörð enda mikið af hagmæltum nemendum í skólanum. Einnig minnum við á að á bóndadaginn eru nemendur hvattir til að mæta í lopapeysu eða öðrum þjóðlegum fötum.
Við endum þessa frétt á Þorraþræli síðasta árs, en það var hún Weronika, sem útskrifaðist síðasta vor, sem samdi hann.
Selshreyfa og súran koll
sviðakjamma heita.
Ét svo þar til ég fæ hroll
ábótinni neita.
