Til hamingju krakkar og foreldrar með áfangann að ljúka enn einu skólaárinu. Það hefur margt verið gert og ýmislegt var lært þennan veturinn en hæst ber þó að nefna uppfærsluna á Ronju Ræningjadóttur. Þetta var mikill leiksigur hjá öllum nemendum og það var gaman að heyra hrifningu áhorfenda eftir árshátíðina. Við erum afar stolt af nemendum sem lögðu sig alla fram í því sem þau voru að gera, sama hvort þau voru í hlutverki uppi á sviði eða komu að sýningunni með öðrum hætti. Kennarar og starfsfólk lögðu sama metnað í verkið og það skein gleðin úr hverju andliti.
Síðustu dagar skólaársins voru vel nýttir í góða veðrinu og fóru nemendur í m.a. í skemmtilegar vorferðir. Sem dæmi fóru krakkarnir í 1.-4. í LAVA safnið á Hvolsvelli og Þorsteinslund. Nemendur í 5. og. 6. bekk voru boðnir heim til umsjónarkennara sinna og áttu góðar dag með þeim. 9. bekkur fór í Þórsmörk og gistu þar eina nótt og 10. bekkur átti yndislega viku í Kóngsins Köben. Þess á milli voru dagarnir nýttir í leik og starf hér á Laugalandi.
Myndir frá Ronju og því sem við höfum verið að bralla nú í vor má finna í myndaalbúminu eða með því að ýta á takkana hér fyrir neðan.
Starfsfólk Laugalandsskóla þakkar öllum fyrir frábært samstarf á skólaárinu og hlökkum til að hitta ykkur í haust.
Hafið það gott í sumar.
